GURASO ELKARTEA

 

Zubieta Herri Eskola, Donostia eta Usurbilgo lurretan kokatua dago. Auzo horietako ikasleak etortzeaz gain, ondoko Lasarte-Oriako ikasleen presentzia ere, ugaria da. Zubietan herri kontzientzia dago, bizilagunak administratiboki Donostiakoak edo Usurbilgoak diren alde batera utzita, herri batzarra dago eta eskolarekin harreman zuzena du.

Auzoan dagoen eskola bakarra da, 2 urtetatik 12 urte bitarteko ikasleak jasotzen ditu,orotara 78 ikasle daude egun. Eskola landa eremuan kokatua dago eta gure ikasleak naturarekin harremanetan hazi eta hezitzen dira. Eta errealitateak eskaintzen dituen bizipenak bilatzen ahalegintzen gara.

Proiektu bidezko metodologia da gure eskolaren lan egiteko modua. Honela, adin ezberdinetako ikasleak nahastuta elkar eraginean lan egiteaz gain, euren interesetan oinarritutako hezkuntza bat eskaintzea da helburua. Eta nola ez, ikasle bakoitzaren garapen prozesua, erritmoa, errespetatzen da, ahalik eta hezkuntza pertsonalizatuena jaso dezaten.

Bukatzeko esan, ikaslea dela gure ardatza, eta pertsona guztiek beren burua garatzeko, herritar aktiboak izateko, gizarteratzeko, lan egiteko, emozionalki oreka bat izateko eta arazo-egoerak eraginkortasunez ebazteko baliabideak jorratzen jarraitu nahi dugu

Eskolari buruzko informazio gehiago nahi izanez gero, www.eskolatxikiak.eus webgunean aurki dezakezue.

Guraso Elkartekoekin harremanetan jartzeko berriz, idatzi emaila iraunkorrazubige@gmail.com helbidera eta ahal bezain pronto erantzungo dizugu.